महाकुम्भमा भयानक दुर्घटना हुँदा १० जनाको मृत्यु, १९ घाइते

प्रयागराज - भारतको उत्तर प्रदेशको प्रयागराजमा ठूलो दुर्घटना भएको छ।

महाकुम्भमा स्नान गर्न आएका १० श्रद्धालुको मृत्यु भएको छ भने १९ जना घाइते भएका छन्। 

बोलेरो र बस एक-आपसमा ठोक्किँदा अहिलेसम्म १० जनाको मृत्यु भएको भारतीय सञ्चारमाध्यमले जनाएका छन्।

बस र बोलेरोमा सवार सबै मध्यप्रदेश र छत्तीसगढका बासिन्दा रहेको प्रारम्भिक जानकारीमा आएको छ। अहिले घाइतेहरूलाई अस्पताल लगिएको छ।

जानकारी अनुसार मेजाको प्रयागराज-मिर्जापुर राजमार्गमा शुक्रबार राति यो घटना भएको हो।

भक्तजन बोकेको बोलेरो र एक आपसमा ठोक्किँदा बोलेरोमा सवार १० भक्तजनको घटनास्थलमै ज्यान गएको प्रहरीले जनाएको छ। ती सबै छत्तीसगढको कोरबा जिल्लाका बासिन्दा रहेको र संगम स्नान गर्न जाँदै गरेको बताइएको छ।

अर्कोतर्फ बसमा सवार १९ जना पनि दुर्घटनामा घाइते भएका छन्। यी मानिसहरू संगममा स्नान गरेर बाराणसी फर्किरहेका थिए। घाइते सबैलाई सिएचसी रामनगरमा भर्ना गरिएको बताइएको छ।

बसमा सवार सबै मध्यप्रदेशको राजगढ जिल्लाका बासिन्दा हुन्। प्रहरीले दुर्घटनाको अनुसन्धान गरिरहेको जनाएको छ।