सत्ता छुटेको पीडामा कांग्रेस छाती पिटेर रुँदैछ : केपी ओली

धनगढी, चैत ६- पूर्वप्रधानमन्त्री तथा नेकपा एमालेका अध्यक्ष केपी शर्मा ओलीले कांग्रेसले आफूतिर नलागेको झोंकमा गृहमन्त्री रवि लामिछानेलाई फसाउन लागेको बताएका छन्। 

प्रेस चौतारी नेपाल कैलालीले आज धनगढीमा आयोजना गरेको पत्रकार सम्मेलनमा बोल्दै अध्यक्ष ओलीले भने, ‘रवि लामेछाने सहकारीमा संलग्न भएको, सहकारी डुबाएको वा अरु कुनै कुरा प्रमाणित भएको छैन तर कांग्रेसले आफूतिर नलागेकाले बदनाम गर्न र फसाउन खोजिरहेको छ।’ 

आफू प्रधानमन्त्री भएको बेला शेरबहादुर तामाङ र गोकुल बाँस्कोटाको प्रसङ्ग थप्दै उनले भने,  ‘मैले बोलाई चिप्लेकै कारण शेरबहादुर तामाङ र गोकुल बास्कोटालाई फिर्ता बोलाएँ, तर भएको केही पनि थिएन। नेपाली कांग्रेसका मन्त्री त झण्डा हल्लाउँदै अख्तियार गएका थिए, सबैले देखेको होइन? अनि अहिले गृहमन्त्रीका बारेमा कुन नैतिकताले प्रश्न उठाउने?’

उनले कांग्रेसले सरकार छोड्नुपरेको पिडामा छाती पिटिरहेको व्यंग्यसमेत गरे।

‘कांग्रेसको अहिलेको कदम, सरकारबाट बाहिरिएको पीडा हो। उसले सरकारबाट बाहिरिएको पीडामा छाती पिटेर रुँदै के भन्छ? त्यसलाई धेरै महत्व दिईराख्नुपर्ने आवश्यकता छैन,’ अध्यक्ष ओलीले भने।

उनले सुनकाण्डमा माओवादीका उपाध्यक्ष पक्राउ परेको घटनामा पत्रकारहरूले राखेका जिज्ञासामा कानुनअनुसार हुने बताए। ‘सोमबार माओवादीका नेता पक्राउ परेका होइनन्। माओवादीका नेता पक्राउ पर्दैनन् तर अनुसन्धानभित्र आएका जोकोही पनि पक्राउ पर्न सक्छन्,’ अध्यक्ष ओलीले भने।

अध्यक्ष ओलीले  नेकपा एमालेले सुनकाण्डका बारेमा आयोग वा छानबिन समिति गठन हुनुपर्छ भनेर पहिला नै राखेको अडान अहिले पुष्टि भएको बताए। ‘त्यतिबेला हामीले आयोग गठन हुनुपर्छ भन्यौं, तर कांग्रेसले दुई महिला ढिलो गरिदियो,’ अध्यक्ष ओलीले भने।

एक अर्को प्रसङ्गमा ओलीले अबको बाँकी कार्यकाल प्रचण्डनै प्रधानमन्त्री हुने संकेत गरे। पत्रकारहरुको जिज्ञासामा ओलीले भन्नुभयो, ‘मलाई अहिले प्रधानमन्त्री खान मन छैन, अरु कोही तयार भएको छैन। उहाँले (प्रचण्ड)ले नै खानुहोला जस्तो पो देखिएको छ त।’

नयाँ गठबन्धनलाई बाग्मती, गण्डकी र कोशीमा प्रदेश सरकार गठन गर्न असहज भएको र

प्रदेशको भागबण्डा र यी तीन प्रदेशको समीकरणबारे पत्रकारहरुले सोधेका प्रश्नको जवाफमा ओलीले भने, ‘अहिले त्यस बारेमा म केही नभनौं। किनकि, मैले पत्रकारलाई भएको कुरा भन्नुपर्छ। अनुमानका भरमा भन्नु हुँदैन।’