श्रीमतीको हत्यापछि श्रीमानले गरे आत्महत्या

काठमाडौं- इलामको माइजोगमाई–२ मा श्रीमतीको हत्यापछि श्रीमानले आत्महत्या गरेका छन्।

बिहीबार राति ५७ वर्षीय पिताम्बर खतिवडाले आफ्नी जेठी श्रीमती राधिका खतिवडा घिमिरेको भान्सा घरमा हत्या गरी घर बाहिर रुखमा झुन्डिएर आत्महत्या गरेको प्रहरीले जनाएको छ।

खतिवडाका दुई श्रीमती थिए। कान्छी श्रीमती सीता खतिवडासँग बस्दै आएका पिताम्बरले राति जेठी श्रीमतीको घरमा गएर हत्या गरेको प्रारम्भिक अनुसन्धानबाट खुलेको इलाका प्रहरी कार्यालय पशुपतिनगरका प्रहरी निरीक्षक सन्तोष राईले जानकारी दिएका छन्।

कान्छी श्रीमती सीता भने बिहीबार माइती गएको र जेठी श्रीमतीकी छोरी रचना सकुशल रहेको प्रहरीले जनाएको छ।

घटनाको विषयमा थप अनुसन्धान भइरहेको प्रहरीले बताएको छ।