हवाई यात्रुको पीडा: महंगो टिकट पनि पाइँदैन, कालोबजारीप्रति बेखबर मन्त्री!

काठमाडौं- बाढी र पहिरोले देशका धेरै स्थानमा सडक सञ्जाल अवरुद्ध भएको मौका छोपेर हवाई कम्पनीहरूले अन्य समयको भन्दा भाडा बढाएका छन्।

एकातिर हवाई कम्पनीले अन्य समयको भन्दा बढी भाडा लिएका छन् भने अर्कोतर्फ यात्रुले हवाई टिकट पाएका छैनन्। महंगोमा टिकट किन्न तयार हुँदा पनि टिकट नपाइएको हवाई यात्रुको गुनासो रहेको छ। 

हवाई कम्पनीहरूले अकुपेन्सीका आधारमा सामान्य अवस्थामा ७० प्रतिशत न्यूनतम् भाडादरमा हवाई टिकट बेच्ने गरेका थिए भने १५ प्रतिशत मध्यम दर र त्यसपछि १५ प्रतिशत उच्चतम् भाडादरमा बेच्ने गरेका थिए।

तर, अहिले प्राकृतिक विपद र दसैंको अवसरमा उनीहरूले मौका छोपेर न्यूनतम् दरको टिकट नै उपलब्ध नगराएको गुनासो यात्रुको रहेको छ। 

वायुसेवा सञ्चालक संघले आन्तरिकतर्फको हवाई टिकट न्यूनतम् हवाई भाडादरमै बेच्ने निर्णय गरे पनि त्यो निर्णयमै सीमित भएको छ। उनीहरूले सरकार र यात्रुलाई झुक्याएको पाइएको छ।

दसैको अवसरमा धेरैजसो टिकट अग्रिम बुकिङ गरिसकेर संघले सस्तो टिकट उपलब्ध गराउने निर्णय गरेको देखिन्छ। अहिले हवाई कम्पनीहरुले न त सस्तो दररेटमा टिकट नै बेचेको छ न त टिकट उपलब्ध नै रहेको छ।

सडक सञ्जालबाट आफ्नो गन्तव्यमा जान नसकेको अवस्थामा हवाई टिकट पनि उपलब्ध नभएपछि यात्रु मर्कामा परेका छन्।

अर्कोतर्फ संस्कृति, पर्यटन तथा नागरिक उड्डनमन्त्री बद्री पाण्डेले हवाई भाडा कम गरेको दाबी गर्दै सस्तो प्रचार गरिरहेको भए पनि उनको पहलले यात्रुलाई कुनै फाइदा पुग्न सकेको छैन।

मन्त्री पाण्डे अहिले अनलाइनमा टिकट नै उपलब्ध नभएको र उपलब्ध भएका टिकट पनि सामान्य समयको भन्दा करिब दोब्बर भाडा रहेकोप्रति बेखबर रहेको देखिन्छ।