आजदेखि अनलाइनबाटै कम्पनी दर्ता र खारेज गर्न सकिने

काठमाडौं- नेपाल सरकारको आर्थिक २०८०/८१ को बजेट वक्तव्यमा घोषणा गरेको अनलाइनबाट कम्पनी दर्ता र खारेज आजदेखि कार्यान्वयनमा आउने भएको छ। कम्पनी रजिस्ट्रारको कार्यालयले अनलाइनबाट नयाँ कम्पनी दर्ता र खारेजी प्रक्रिया अघि बढाएको हो। 

अनलाइनबाटै कम्पनी दर्ता र खारेजीको कार्यान्वयनका लागि कम्पनीहरूको विवरण अद्यावधिक गर्न रजिस्ट्रार कार्यालयले सूचनाका साथ निर्देशन पनि जारी गरेको छ। कम्पनी कार्यालयकाअनुसार हालसम्म करिब तीन लाख सात हजार ७९७ कम्पनी दर्ता भएका छन्।

'नीति कार्यान्वयनको लागि यस कार्यालयले निकट भविष्यमा कम्पनी दर्ता, कम्पनी प्रशासन एवं खारेजी सम्बन्धी सेवा लिनको लागि हुलाक सेवा प्रदायकसंगको सहकार्यमा सेवाग्राही कम्पनीको संचालक वा प्रतिनिधि यस कार्यालयमा भौतिक रुपमा उपस्थित हुनु नपर्ने छ,' कार्यालयले जारी गरेको सूचनामा भनिएको छ।

सोही प्रयोजनको लागि कार्यालयलाई कम्पनी सम्बद्ध विभिन्न सूचना तथा जानकारी एवं परिमाजिर्त तथा सम्पादित कागजातहरु आवश्यक भएकोले कम्पनी ऐनको दफा १६ तथा दफा १७८ ले दिएको अधिकार प्रयोग गरी ऐनको दफा १८५ वमोजिम नियुक्त कम्पनी सचिव, कम्पनी सचिवको रुपमा काम गर्न तोकिएको कर्मचारी, कम्पनीका संचालक एवं प्रचलित कानुनले कम्पनी वा ट्रष्ट सेवा प्रदायक भनी परिभाषित गरिएका संस्था वा व्यक्तिहरुलाई विभिन्न निर्देशन जारी गरेको छ।

यस्तै कम्पनीको इमेल ठेगाना अध्यावधिक गर्नुपर्ने भए गर्न त्यस्तो इमेल ठेगाना र कार्यालयले दिएको पासवर्ड कम्पनीको आधिकारीक व्यक्तिको नियन्त्रणमा राख्न र स्वयं प्रयोग गर्न समेत सूचित गरिएको छ।

कम्पनी रजिष्ट्रार कार्यालयकाअनुसार कम्पनी संस्थापना गर्दा वा शेयर खरिद विक्रीको चरणमा कम्पनीका शेयरधनी तथा संचालकहरुको राष्ट्रिय परिचयपत्र नम्बर समेत आगामी दिनमा अनिवार्य गर्ने, राष्ट्रिय परिचयपत्र तथा पञ्जिकरण विभागसंगको सहकार्यमा व्यक्तिको वायोमेट्रिक विवरण समेत रुजु गर्ने कार्ययोजना रहेकोले कम्पनीका शेयरधनीहरुको व्यक्तिगत विवरणमा राष्ट्रिय परिचयपत्र नम्बर र विस्तृत ठेगाना  अध्यावधि गर्न दर्ता भएका कम्पनीहरुलाई निर्देशन दिएको छ।