टेक्सासमा ट्रम्प नीतिको डरले ११ वर्षीया आप्रवासी बालिकाले गरिन् आत्महत्या

टेक्सास - अमेरिकाको टेक्सासमा ११ वर्षीया बालिकाले आत्महत्या गरेको एउटा हृदयविदारक घटना सार्वजनिक भएको छ।

परिवारको अध्यागमन अवस्थाका कारण विद्यालयमा उनलाई लगातार जिस्क्याउने गरेको र स्कुलमा उनका सहपाठीहरूले आमाबुवालाई अमेरिकाबाट निकालिने र एक्लै छाड्ने धम्की दिएपछि प्रताणित भएर आत्महत्या गरेको खुलेको हो।

यही मानसिक तनाव र डरका कारण ११ वर्षीया बालिकाले आत्महत्या गरेको अन्तर्राष्ट्रिय सञ्चारमाध्यमले जनाएका छन्।

समाचार अनुसार टेक्सास निवासी जोसेलिन रोजो कारान्जा नामकी छात्राले विद्यालयमा लगातार दुर्व्यवहारको सिकार भोगेकी थिइन्।

उनको परिवारको अध्यागमन स्थितिका कारण उनको विद्यालयका केही विद्यार्थीहरूले उनलाई उत्पीडन गरेको आरोप छ।

उनलाई आमाबुवालाई साङ्लोमा बाँधेर देशबाहिर पठाइदिने र एक्लै छाडने भन्ने डर देखाइने गरिएको थियो। यही मानसिक यातनाको सिकार बनेर जोस्लिनले ८ फेब्रुअरीमा आत्महत्या गरेकी हुन्।

जोसेलिनकी आमा मार्बेला कारान्जाले आफ्नी छोरीमाथिको यातनाबारे आफूलाई पहिले कुनै जानकारी नभएको बताइन्।

उनले भनिन्,  ‘मेरी छोरीले आफू यति तनावमा छिन् भन्ने कुनै संकेत कहिल्यै दिइनन्। मलाई कहिल्यै थाहा थिएन कि उसलाई स्कुलमा दुर्व्यवहार गरिएको थियो।'

यस विषयमा छानबिन सुरू भएपछि मात्र जोस्लिनले विद्यालयमा छोरीमाथि निरन्तर दुर्व्यवहार भइरहेको खुलेको थियो। तर, विद्यालय प्रशासनले उनीहरूलाई यसबारे कुनै जानकारी परिवारलाई दिएन।

अहिले जोस्लिनले आत्महत्या गरेपछि विद्यालय प्रशासन नै शंकाको घेरामा परेको छ। विद्यालयलाई यसबारे जानकारी भए पनि कुनै कारबाही नगरेको उनकी आमाको आरोप छ।

गेनेसभिल इन्डिपेन्डेन्ट स्कुलमाथि जिल्ला प्रहरीले यस विषयमा अनुसन्धान गरिरहेको छ। विद्यालय प्रशासनले दुर्व्यवहारका घटनालाई नजिकबाट नियाल्ने र त्यस्ता गुनासोहरूलाई गम्भीरताका साथ लिने बताए पनि जोसलिनको मुद्दामा कुनै ठोस वक्तव्य जारी नगरिएको उल्लेख गरिएको छ।

जोस्लिनको अन्त्येष्टि बुधबार मात्रै भएको थियो, जसमा सयौं मानिसहरूको सहभागिता रहेको थियो। यही क्रममा उनकी साथी रूबेलाले भनिन्, ‘हामी सँगै रुख चढ्ने गर्दथ्यौं, हाँस्ने गर्दथ्यौं र हाम्रा हरेक साना-ठूला कुरा साझा गर्थ्यौं। उनी एकदमै असल साथी थिइन्।’ 

जोसेलिनको मृत्युले अमेरिकामा बाल बालिकामाथि हुने दुर्व्यवहार र आप्रवासी परिवारमाथि हुने भेदभावको गम्भीरतालाई उजागर गरेको अन्तर्राष्ट्रिय समाचार माध्यमले जनाएका छन्। यो घटनापछि धेरै संघ-संस्थाले विद्यालयमा हुने दुर्व्यवहार रोक्न थप कडा कानुन बनाउन सरकारसँग माग गरेका छन्। 

साथै, आप्रवासी परिवारका बालबालिकालाई सुरक्षित वातावरण प्रदान गर्नका लागि कदम चाल्नुपर्नेमा पनि जोड दिइएको छ। जोसेलिनको परिवारले मृतकको  न्यायका लागि माग गर्ने बताएका छन् ताकि अन्य निर्दोष व्यक्तिको जीवन यसरी समाप्त नहोस्।