बझाङ दुर्घटना अपडेट : सुदूरपश्चिम सरकारका मन्त्री सिंहकी पत्नी र भाउजुको मृत्यु

काठमाडौं- बझाङमा भएको गाडी दुर्घटनामा सुदूरपश्चिम सरकारका आन्तरिक मामिलामन्त्री पृथ्वीबहादुर सिंहकी पत्नी र भाउजुको मृत्यु भएको छ।

दुर्घटनामा परी गम्भीर घाइते भएकी मन्त्री सिंहकी पत्नी अमृता सिंह र भाउजु जयादेवी सिंहको मृत्यु भएको हो।

त्यस्तै गम्भीर घाइते रहेका मन्त्री सिंहसहित तीन जनालाई थप उपचारका लागि हेलिकप्टरबाट नेपालगञ्ज पठाइएको प्रहरीले जनाएको छ।

प्रहरीका अनुसार घाइते मन्त्री सिंह, उनका पिएसओ दीपक भण्डारी र गाडी चालक धर्मराज जोशीलई उपचारका लागि नेपालगञ्ज पठाइएको हो।

मन्त्री सिंह चढेको सुपप्र ०१००१ झ ४८० नम्बरको गाडी डडेलधुराबाट चैनपुर आउने क्रममा मंगलबार दिउँसो केदारस्युँ गाउँपालिकाको धारछडामा दुर्घटना भएको थियो।

सडकबाट अन्दाजी ५० मिटर तल कालंगा खोला किनारमा गाडी खसेर दुर्घटना भएकोे बताइएको छ।

दुर्घटनामा घाइते भएकालाई अर्को गाडीमा रहेका सुरक्षाकर्मीले उद्धार गरी केदारस्युँ गाउँपालिका–१ देउरास्थित ऋतु पोलिक्लिनिकमा उपचारका लागि पठाएका थिए।