चराको प्वाँख २८ हजार डलरमा बिक्यो

काठमाडौं- न्यूजील्याण्डको लोप भइसकेको हुइया चराको प्वाँख २८ हजार ४१७ डलरमा लिलामी भएको छ। 

लिलामी गर्ने कम्पनीले तीन हजार डलरसम्म पुग्ने अपेक्षा गरेको तर यो प्वाँखको लिलामीले पुरानो रेकर्ड ध्वस्त भएको बताएको छ।

यो चरा न्युजील्याण्डको माओरी जनजातिका लागि धेरै पवित्र मानिन्थ्यो। यी मानिसहरू आफ्नो पगडीमा यो चराको प्वाँख लगाउने गर्थे वा यो प्वाँखलाई उपहारको रूपमा पनि प्रयोग गरिन्थ्यो।

न्यूजील्याण्डको संग्रहालयका अनुसार यो चरा अन्तिम पटक सन् १९०७ मा देखिएको थियो। दुई-तीन दशकअघि पनि यसको दर्शनका केही अपुष्ट समाचारहरू आएका थिए।

यो चरा यसको जम्प गर्ने क्षमता र सुन्दर प्वाँखका लागि परिचित थियो। सोमबार लिलामी गरिएको प्वाँख राम्रो अवस्थामा रहेको र कीराले क्षति नगरेको लिलामी कम्पनीले जनाएको छ।