मोरङ चेम्बरले गर्‍यो उपप्रधानमन्त्री सिंहसँग अन्तरक्रिया

विराटनगर- मोरङ चेम्बर अफ कमर्सले नेपाल सरकारका उप-प्रधानमन्त्री तथा सहरी विकास मन्त्री प्रकाशमान सिंहसँग विशेष अन्तरक्रिया कार्यक्रम सम्पन्न गरेको छ।

शुक्रबार भएको कार्यक्रमका प्रमुख अतिथि उप-प्रधानमन्त्री सिंहज्यूले सहरी विकास र व्यापारका विविध पक्षमा सरकारको दृष्टिकोण र योजना प्रस्तुत गरेका थिए।

विशिष्ट अतिथिहरूमा विराटनगर महानगरपालिकाका प्रमुख नागेश कोइराला, मोरङ जिल्ला प्रशासन कार्यालयका प्रमुख जिल्ला अधिकारी प्रेमप्रसाद भट्टराई, जिल्ला प्रहरी कार्यालय मोरङका प्रहरी उपरीक्षक नारायणप्रसाद चिमरिया, विराटनगर भन्सार कार्यालयका प्रमुख ज्ञानेन्द्र ढकाललगायत सहभागी थिए।

कार्यक्रमको सभापतित्व मोरङ चेम्बर अफ कमर्सका अध्यक्ष यादव पोखरेलले गरेका थिए। उनले मोरङ जिल्लाको आर्थिक, व्यापारिक, र औद्योगिक गतिविधिलाई प्रवर्द्धन गर्न यस्ता कार्यक्रमहरू आवश्यक रहेको उल्लेख गरे।

कार्यक्रममा विभिन्न संघ-संस्थाका प्रतिनिधिहरू, चेम्बरका कार्यसमिति सदस्यहरू र आजीवन सदस्यहरूको उपस्थिति रहेको थियो।

अन्तरक्रियामा सहभागीहरूले सहरी विकास, व्यापार प्रोत्साहन, र भन्सार तथा राजस्व व्यवस्थापनका विषयमा आफ्ना धारणा राख्दै समस्या समाधानका लागि सुझाव पनि प्रस्तुत गरे। कार्यक्रममा उठेका महत्वपूर्ण विषयहरूलाई सरकारले प्राथमिकतामा राख्ने उप-प्रधानमन्त्री सिंहले प्रतिबद्धता जनाए।

अन्तरक्रियाले व्यापारिक समुदाय र सरकारबीच सहकार्यका लागि नयाँ आयाम थप्ने विश्वास गरिएको छ।