दादुराका कारण १३ बालबालिकाको मृत्यु

खार्तुम, सुडान । सुडानको ह्वाइट नाइल राज्यको आन्तरिक विस्थापन शिविरमा दादुराको प्रकोप फैलिँदा हालैका हप्ताहरूमा कम्तीमा १३ बालबालिकाको मृत्यु भएको एक स्वास्थ्यसम्बन्धी अन्तर्राष्ट्रिय गैरसरकारी संस्थाले आइतबार जानकारी गराएको छ ।

‘डाक्टर्स विदाउट बोर्डर्स’ अर्थात् ‘मेडिसिन्स साइन्स फन्टियर्स (एमएसएफ)’ को सुडानी शाखाद्वारा जारी एक विज्ञप्तिमा भनिएको छ, ‘स्थिति गम्भीर छ । शङ्कास्पद दादुरा र बालबालिकामा कुपोषण सबैभन्दा अत्यावश्यक स्वास्थ्य समस्या हो।’

एमएसएफको ट्वीट मार्फत् सम्प्रेषित विज्ञप्तिमा भनिएको छ,‘सुडानको ह्वाइट नाइल राज्यमा द्वन्द्वबाट भाग्ने मानिसहरूको सङ्ख्या बढ्दो छ। नौवटा शिविरमा मुख्यतया महिला र बालबालिका गरी लाखौँको सङ्ख्यामा मानिस बसिरहेका छन्।’ गैरसरकारी संस्थाले गत जुन ६ देखि २७ सम्म ह्वाइट नाइल शिविरमा दादुराका शङ्कास्पद २२३ बालबालिकाको उपचार गरेको थियो भने १३ जनाको मृत्यु भएको छ । एमएसएफले सहयोग गर्ने दुईवटा क्लिनिकबाट ७२ जनालाई उपचार गरिरहेको छ।

विज्ञप्तिमा भनिएको छ, ‘हामीले हरेक दिन दादुराको शङ्कास्पद बिरामी बालबालिकालाई ल्याइरहेका छौं। गैरसरकारी संस्थाका अनुसार जुन महिनामा यी दुई क्लिनिकमा कुल तीन हजार १४५ जना बिरामी आएका छन्।’

उनले भने, ‘जति धेरै मानिस आउँछन्, सहयोग, खोप, पोषण सहायता, आवास, पानी र सरसफाइजस्ता सेवा तत्काल बढाउन आवश्यक छ। वर्षायाम नजिकिँदै छ र हामी यस क्षेत्रमा पानी जन्य रोग र औलोको प्रकोप बढ्दै गएकोमा चिन्तित छौं ।’

गत अप्रिल १५ मा सुडानी सशस्त्र बल (एसएएफ) र अर्ध सैनिक र्‍यापिड सपोर्ट फोर्सेज (आरएसएफ) बीच युद्ध सुरु भएयता सुडानी शरणार्थीको सङ्ख्यामा तीव्र वृद्धि भएको छ ।

संयुक्त राष्ट्रसङ्घीय आप्रवासन निकाय ९आइओएम० को तथ्याङ्कअनुसार करिब २८ लाख मानिस पलायन भएका छन् ।  रासस/एएनआई