हुलाकी राजमार्गको काम पाँच वर्षदेखि अलपत्र, सर्वदलीय आन्दोलनको तयारी

विराटनगर - पूर्व-पश्चिम जोड्ने महत्वाकांक्षी योजना अन्तर्गत मोरङको कटहरी गाउँपालिकामा निर्माणाधीन हुलाकी राजमार्गको काम पाँच वर्षदेखि अलपत्र परेको छ।

सडक निर्माण कार्य सुस्त हुँदा स्थानीय जनताले हिलो र धूलोको समस्याका कारण दैनिक जीवनमा कठिनाइ भोग्नु परेको छ।

२०७६ सालमा तीन वर्षभित्र निर्माण सम्पन्न गर्ने लक्ष्यसहित सुरू गरिएको ४४ किलोमिटरको यो योजनामा हालसम्म २२ प्रतिशत मात्रै काम भएको छ। तीन अर्ब ६० करोड रुपैयाँको लागतमा ठेक्का लिएका ठेकेदार कम्पनीहरूले ८० प्रतिशत रकम खर्च गरिसकेका छन्, तर भौतिक प्रगति न्यून रहेको स्थानीयले बताएका छन्।

कटहरी गाउँपालिकाका अध्यक्ष देवराज चौधरीले सडक निर्माणको ढिलासुस्तीका कारण स्थानीय बासिन्दाहरूको घरमा धूलोले बस्नै नसकिने अवस्था आएको बताए। उनले भने, ‘अबको एक हप्ताभित्र काम सुरू नगरे हामी सबै जनतालाई साथमा लिएर संघर्षमा उत्रिनेछौं।’

निर्माण कार्यको जिम्मा लिएका गजुरमुखी र श्रेष्ठ कन्स्ट्रक्सन प्रालिका साथै अन्य पाँच ठेकेदार कम्पनीहरू छन्। उनीहरूले निर्माण कार्यमा देखाएको हेलचेक्र्याइँका कारण समस्या थपिएको छ।

सर्वदलीय बैठकको निर्णय

सडक निर्माणको ढिलासुस्तीले सर्वसाधारणलाई सास्ती भोग्न बाध्य बनाएको भन्दै कांग्रेस, एमाले, माओवादी, जसपा, राप्रपासहित सात दल र विभिन्न संघसंस्थाले संयुक्त रूपमा आन्दोलनमा जाने निर्णय गरेका छन्।

शुक्रबार आयोजित सर्वदलीय बैठकपछि उनीहरूले मोरङका प्रमुख जिल्ला अधिकारी प्रेमप्रसाद भट्टराईलाई ज्ञापन पत्र बुझाउँदै काम तत्काल सुरू गर्न माग गरेका छन्।

सडक निर्माण पूरा नहुँदा वर्षामा हिलो र हिउँदमा धूलोका कारण यात्रु र स्थानीय बासिन्दा दुबैलाई कठिनाइ भइरहेको छ। स्थानीय बासिन्दाले पटकपटक काम सुरु गर्न आग्रह गरे पनि कुनै प्रगति नभएको गुनासो गरेका छन्।

सडक किनारका बासिन्दाहरूले धूलोका कारण खानपिन र स्वास्थ्य समस्याको सामना गर्नुपरेको छ। ‘सडकको काम अलपत्र परेपछि बर्खामा हिलोले बाटो हिँड्न सकिँदैन, हिउँदमा धूलोले स्वास्थ्यमा असर पुऱ्याएको छ,’ अध्यक्ष चौधरीले बताए।

सर्वदलीय भेलाले ठेकेदार कम्पनीलाई काम सुरू गर्न चेतावनी दिँदै समयमै काम पूरा नगर्ने ठेकेदारलाई कालोसूचीमा राख्न माग गरेको छ। उनीहरूले आगामी सात दिनभित्र काम सुरु नभए आन्दोलन गर्ने निर्णय गरेका छन्।

पूर्व-पश्चिम राजमार्गको वैकल्पिक मार्गको रूपमा निर्माण भइरहेको यो हुलाकी राजमार्ग राष्ट्रिय गौरवको आयोजना हो। तर, पाँच वर्ष बितिसक्दा पनि निर्माण कार्यले गति लिन नसक्दा सरकार र निर्माण व्यवसायीप्रति जनआक्रोश बढ्दै गएको छ।