सहकारी ठगीका आरोपी गृहमन्त्री लामिछाने भन्छन् - जीबी राईलाई अघिल्लो सरकारले भगायो

चितवन- उपप्रधान तथा गृहमन्त्री रवि लामिछानेले जीबी राईलाई अघिल्लो सरकारले भगाएको आरोप लगाएका छन्।

शनिबार विहान चितवन पुगेका लामिछानेले सञ्चारकर्मीसँगको कुराकानीका क्रममा जीबी राइलाई अघिल्लो सरकारले भगाएको आरोप लगाउदै 'भगाएको मान्छे' लाई खोज्न समय लाग्ने प्रतिक्रिया दिएका हुन्।

जीबी राई किन पक्राउ पर्न सकेनन्? भनेर सोधेको प्रश्नको जवाफमा गृहमन्त्री लामिछानेले भने, 'भगाइसकेको मान्छेलाई खोज्न समय लाग्ने भएकाले हर कोसिस भइरहेको छ।' त्यसपछि त्यसो भए कसले भगायो? भन्ने प्रश्नमा उनले भने, 'भाग्दाखेरी सरकारमा को थियो?'

उनले जीबी राईका सन्दर्भमा केही प्रक्रिया पूरा गर्नुपर्ने भएकाले समय लागेको बताए। उनले संसद्‌मा आफूलाई बोल्ने अधिकारबाट बञ्चित गरिएको भन्दै गुनासो गरेका थिए।

लामिछाने र राई दुबैमाथि सहकारी ठगेको आरोप छ। लामिछानेमाथि प्रमुख प्रतिपक्षी दल नेपाली कांग्रेसले संसदीय छानबिन समिति माग गरिरहेको छ।