.png)
त्रिकोणात्मक श्रृंखला : युएईसँग नेपाल ४ विकेटले पराजित
काठमाडौं- त्रिकोणात्मक टि–२० श्रृंखलामा नेपाल युएईसँग ४ विकेटले पराजित भएको छ।
त्रिवि मैदानमा शुक्रबार भएको श्रृंखलाको अन्तिम खेलमा नेपाल युएईसँग पराजित भएको हो।
नेपालले जितका लागि दिएको १६३ रनको लक्ष्य युएईले एक बल बाँकी छँदा ६ विकेट गुमाएर पूरा गर्यो।
युएईका लागि मुहम्मद वासीमले सर्वाधिक ४५ रन बनाए। २२ बलको सामना गरेका उनले ७ चौका र २ छक्का प्रहार गरे।
त्यस्तै अर्यान्स शर्माले २५, व्रितिया अरविन्दले २६, बासील अहमदले २२, एलिसान सारफूले १३ र अली नसीरले ११ रनको योगदान दिए।
युएईले ६ विकेटको क्षतिमा १६७ रन बनायो।
नेपालका लागि गुल्शन झा र अविनास बोहराले २–२ तथा कुशल मल्लले १ विकेट लिए।
यसअघि टस हारेर पहिले ब्याटिङ गरेको नेपालले निर्धारित २० ओभरमा ८ विकेटको क्षतिमा १६२ रन बनाएको थियो।
नेपालका लागि ओपनर कुशल भुर्तेलले सर्वाधिक ५० रन बनाएका थिए। २९ बलको सामना गरेका उनले ६ छौका र ३ छक्का प्रहार गरेका थिए।
युएईविरूद्धको अन्तिम खेलमा भुर्तेलबाहेक नेपालका अरू ब्याटरहरूले उल्लखनीय प्रदर्शन गर्न सकेनन्।
नेपालका लागि दीपेन्द्रसिंह ऐरीले २०, कप्तान रोहितकुमार पौडेलले १८, सोमपाल कामीले १३ र सन्दीप जोराले १० रनको योगदान दिएका थिए।
नेपाल र युएईसँग हङकङ सहभागी श्रृंखलामा नेपालले लिग चरणमा सबै खेल जितेर फाइनलसम्मको यात्रा तय गरेको थियो।
युएई चार खेलबाट दुई अंकसहित दोस्रो स्थानमा रहँदै फाइनलमा स्थान बनाएको थियो।
युएई र हङकङको समान अंक भए पनि नेट रनरेटका आधारमा युएई फाइनलमा पुगेको हो।
