रवि लामिछानेको सांसद पद निलम्बनमा

काठमाडौं - राष्ट्रिय स्वतन्त्र पार्टी (रास्वपा) का सभापति रवि लामिछाने सांसद पदबाट निलम्बित भएका छन्।

संघीय संसद् सचिवालयले आइतबार एक सूचना जारी गर्दै लामिछाने मनी लाउन्डरिङ (सम्पत्ति शुद्धीकरण), संगठित अपराध, र सहकारी ठगी मुद्दामा थुनामा रहेकाले पदबाट स्वतः निलम्बित भएको जानकारी दिएको हो।

संघीय संसद् सचिवालयद्वारा जारी सूचनामा 'सम्पत्ति शुद्धीकरण निवारण ऐन, २०६४' को दफा २७ उल्लेख गरिएको छ, जसमा थुनामा रहेको अवधिभर सम्बन्धित व्यक्ति स्वतः निलम्बन हुने व्यवस्था छ। लामिछानेमाथि उक्त ऐनअन्तर्गत मुद्दा दायर भएकाले यो कानुनी प्रावधान लागू भएको हो।

जिल्ला सरकारी वकिल कार्यालय, कास्कीले लामिछानेविरुद्ध तीन वटा गम्भीर आरोपमा मुद्दा दायर गरेको छ। ती हुन् सम्पत्ति शुद्धिकरण (मनी लाउन्डरिङ), संगठित अपराध र सहकारी ठगी।

लामिछानेलाई गत कात्तिक २ गते काठमाडौंमा प्रहरीले पक्राउ गरेको थियो। संविधानको धारा १०३ अनुसार कुनै पनि प्रतिनिधि सभा सदस्य फौजदारी अभियोगमा पक्राउ परेमा सभामुखलाई तत्काल जानकारी दिनुपर्ने प्रावधान छ। सोही व्यवस्था अनुसार कास्की प्रहरीले आइतबार संसद् सचिवालयलाई पत्र पठाएर मुद्दा दर्ता भएको जानकारी दिएको थियो।

रवि लामिछाने चितवन क्षेत्र नम्बर २ बाट निर्वाचित सांसद हुन्। उनले राष्ट्रिय स्वतन्त्र पार्टीको नेतृत्व गर्दै छोटो समयमै राजनीतिक वृत्तमा ठूलो प्रभाव पारेका थिए। उनले आफू गृहमन्त्री हुँदा सहकारी ठगी प्रकरण छिपाउन खोजेका थिए।

थुनामा रहेका र मुद्दा दायर भएको कारण लामिछानेको सांसद पद हालका लागि निलम्बित गरिएको छ। अब मुद्दाको किनारा नलाग्दासम्म यो स्थिति यथावत् रहनेछ।