चिकित्सकहरूलाई स्वास्थ्यमन्त्रीको अनुरोध – आन्दोलन फिर्ता लिनुस्

काठमाडौं- स्वास्थ्य तथा जनसंख्यामन्त्री मोहनबहादुर बस्नेतले चिकित्सकहरूलाई आन्दोलन फिर्ता लिन आग्रह गरेका छन्।

चिकित्सक र स्वास्थ्यकर्मीमाथि पटक–पटक भएका दुव्र्यवहारका घटनामा संलग्नलाई कारबाही गर्न सरकार प्रतिबद्ध रहेको उनको भनाइ छ।

शिक्षा, स्वास्थ्य तथा सूचना प्रविधि समितिको बैठकमा मन्त्री बस्नेतले चिकित्सकलाई आन्दोलन स्थगित गरी काममा फर्कन अनुरोध गरे।

उनले पछिल्लो समय चारवटा अस्पतालमा भएका घटनाबारे अनुसन्धान भइरहेको जानकारीसमेत दिए।

चिकित्सकहरूलाई सुरक्षाको प्रत्याभूतिको सरकारले दिनेमा उनले प्रतिबद्धता जनाएका छन्।

मन्त्री बस्नेतले भने,‘यो समस्याको दीर्घकालीन समाधानका लागि सरकार गम्भीर छ। पछिल्ला चारवटा घटनाको छानबिन र कारबाहीको काम गृ मन्त्रालयले अघि बढाइसकेको छ। आन्दोलन फिर्ता लिएर सेवामा फर्किन अनुरोध छ।’

बस्नेतले मणिपाल अस्पताल घटनामा संलग्न भनिएको व्यक्तिलाई पक्राउ गरेको र प्रहरीलाई समेत निलम्बन र विभागीय कारबाही थालिसकेको बताए।

अन्य कानुनी प्रक्रियाका लागि काम गरिरहेका संरचनालाई निरन्तरता दिने उनको भनाइ थियो।

उनले स्वास्थ्य क्षेत्रका अधिकांश समस्या समाधानका लागि दरबन्दी थप्ने काम अघि बढेको पनि जानकारी दिए।

‘अहिले देखिएका अधिकांश समस्याका पछाडि कम दरबन्दी हुनु पनि हो, दरबन्दी थप्ने काम भइरहेको छ,’ बस्नेतले भने,‘चिकित्सक र स्वास्थ्यकर्मीको दरबन्दी थप्न प्रधानमन्त्री सकारात्मक हुनुहुन्छ।’

बैठकमा गृह मन्त्रालयका सचिव दिनेश भट्टले आन्दोलनरत आवासीय चिकित्सकलाई आन्दोलनको कार्यक्रम फिर्ता लिएर काममा फर्कन आग्रह गरे।

उनले भने,‘घटनामा संलग्नलाई कारबाही गर्न प्रशासन प्रयत्नशील छ। आन्दोलनले आमनागरिकमा पर्न गएको समस्याप्रति संवेदनशील बन्न आग्रह गर्दछु।’

आन्दोलनरत आवासीय चिकित्सकहरूले आफ्नो सुरक्षाका लागि सडकमा उत्रन बाध्य भएको बताए।

उनीहरूले मणिपाल शिक्षण अस्पतालमा भएको घटनामा संलग्नलाई तत्काल कारबाहीको माग गरे।

समितिका अधिकांश सदस्यले समस्याको दीर्घकालीन समाधान खोज्नेतर्फ जोड दिएका थिए।

समिति सभापति भानुभक्त जोशीले चिकित्सकमाथि भएको दुव्र्यवहारको स्थलगत अध्ययन गरेर दीर्घकालीन समाधान खोज्ने बताए।