इजरायलबाट नेपालीको शव तत्काल ल्याउने व्यवस्था मिलाउन सभामुखको आग्रह

काठमाडौं- सभामुख देवराज घिमिरेले इजरायलमा आतंकारी संगठन हमासको आक्रमणमा परी मृत्यु भएका नेपालीको शव तत्काल ल्याउने व्यवस्था मिलाउन सरकारसँग आग्रह गरेका छन्। सभामुख घिमिरेले स्वदेश आउन चाहने नेपालीलाई पनि यथासक्य चाँडो ल्याउने व्यवस्था मिलाउन अनुरोध गरेका छन्।

सभामुख घिमिरे बुधबार शोक वक्तव्य जारी गर्दै दक्षिण इजरायलको किवुज अलुमिम भन्ने स्थानमा भएको आक्रमणमा १०  नेपालीको निधन भएकामा दुःख प्रकट गर्दै उक्त आग्रह  गरेका हुन्।

शोक वक्तव्यमा भनिएको छ, 'सम्भावित आक्रमणको जोखिममा रहेका सबै नेपालीलाई सुरक्षित स्थानमा राख्न, नेपाल फर्कन चाहनेलाई सोहीबमोजिमको व्यवस्था गर्न र जीवन गुमाएका नेपालीको शव फिर्ताका लागि आग्रह गर्दछु ।' 

सभामुख घिमिरेले विद्रोही आक्रमणमा घाइते भइ स्थानीय अस्पतालमा उपचाररत नेपालीहरूको शीघ्र स्वास्थ्यलाभको कामना गर्दै सम्पर्कविहीनको खोजबिनका लागि सबै संयन्त्र परिचालन गर्न सरकारको ध्यानाकर्षण गराएका छन् । उनले मृतकप्रति हार्दिक श्रद्धाञ्जलि अर्पण गर्दै जीवन गुमाउनेहरूको परिवारजन तथा आफन्तजनमा गहिरो समवेदना प्रकट गरेका छन्।