एकै घरका चार जनाको हत्या

काठमाडौं- मुगुमा एकै घरपरिवारका चार जनाको हत्या भएको छ।

छायाँनाथ रारा नगरपालिका–६ स्थित मुन्दु गाउँमा चार जनाको हत्या भएको हो।

जिल्ला प्रहरी कार्यालय मुगुका प्रहरी नायब उपरीक्षक विरेन्द्र थापाका अनुसार धारिलो हतियार प्रहार गरी रातिको समयमा एकै घरपरिवारका चार जनाको हत्या गरिएको छ।

थापले २७ वर्षीया आमा श्रीदेवी बोहरा, ११ वर्षीय छोरा मनोज, ७ वर्षीया छोरी अप्सरा, ८ वर्षीय छोरा रहरको हत्या भएको जानकारी दिएका छन्।

हत्या कसले गरेको भन्नेबारे खुल्न बाँकी रहेको प्रहरीले बताएको छ।

हत्या भएको श्रीदेवीका श्रीमान वैदेशिक रोजगारका लागि कतारमा छन्।

प्रहरीका अनुसार हत्या गर्ने हत्याराले घरभित्र घटना गरेर ढोकामा ताल्चा लगाएर भागेको प्रहरीको भनाइ छ।

घटनाबारे आवश्यक अनुसन्धान भइरहेको प्रहरीले बताएको छ।