चितवनमा १० महिनापछि दुई जनामा देखियो कोरोना संक्रमण

चितवन- चितवनमा १० महिनापछि दुई जनामा कोरोना सङ्क्रमण पुष्टि भएको छ। 

भरतपुर अस्पतालका सूचना अधिकारी गोपाल पौडेलका अनुसार आइतबार र आज गरिएका छुट्टाछुट्टै परीक्षणमा २९ र ६६ वर्षीय पुरुषमा कोरोना पुष्टि भएको हो। 

निमोनियाका कारण उपचारका लागि अस्पताल आएका बृद्धको कोरोना परीक्षणका क्रममा सङ्क्रमण पुष्टि भएको हो। उनलाई अस्पतालमै राखेर उपचार सुरू गरिएको सूचना अधिकारी पौडेलले बताए।  

२९ वर्षीय पुरुषलाई होम आइसोलेसनमा राखिएको उनले जानकारी दिए। जिल्लामा १० महिनापछि पुनः कोरोनाको सङ्क्रमण देखिएको स्वास्थ्य कार्यालय चितवनकी जनस्वास्थ्य अधिकृत गीताञ्जली ढकालले जानकारी दिएका छन्।

कोरोना सङ्क्रमण देखिएपछि स्वास्थ्य कार्यालय चितवनले सबैलाई सतर्कता अपनाउनका लागि आग्रह गरेको छ।