त्रिकोणात्मक श्रृंखला : नेपाल ६ विकेटले विजयी

काठमाडौं- त्रिकोणात्मक क्रिकेट श्रृंखलाको दोस्रो खेलमा पनि नेपालले जित हासिल गरेको छ।

मुलपानी क्रिकेट मैदानमा बिहीबार नेपालले हङकङलाई ६ विकेटले पराजित गरेको हो।

हङकङले दिएको ९५ रनको सामान्य लक्ष्य नेपालले ४ विकेट गुमाएर १३.५ ओभरमा पूरा ग¥यो।

नेपालका लागि ओपनर आसिफ शेखले सर्वाधिक ४२ रन बनाए। ३४ बलको सामना गरेका उनले ६ चौका प्रहार गरे।

त्यस्तै कप्तान रोहित पौडेलले २० बलमा २५, गुलशन झाले ५ बलमा १४ रन बनाए।

हङकङका लागि एसान खानले ३ र एजाज खानले १ विकेट लिए।

यसअघि नेपालले टस जितेर हङकङलाई ब्याटिङका लागि निम्तो दिएको थियो।

नेपाली बलरसामु धारासायी भएको हङकङले १९.३ ओभरमा सबै विकेट गुमाएर ९४ रन बनाएको थियो।