सुधीरकुमार शाह, धर्मप्रसाद गौतम र मीनबहादुर गुरुङ थुना मुक्त नहुने

काठमाडौं– सर्वोच्च अदालतले ललितानिवास प्रकरणमा थुनामा रहेका पूर्वनिर्वाचन आयुक्त सुधीरकुमार शाह, भाटभटेनी सुपरमार्केटका सञ्चालक मीनबहादुर गुरुङल र धर्मप्रसाद गौतमलाई रिहा गर्न अस्वीकार गरेको छ।

न्यायाधीश प्रकाशकुमार ढुंगाना र नहकुल सुवेदीको संयुक्त इजलासले शुक्रवार शाह, गुरुङल र गौतमलाई रिहा गर्न माग गरिएको रिट खारेज गरिदिएको हो।

सञ्चार मन्त्रालयका सचिव कृष्णबहादुर राउतलाई थुनामुक्त गर्न आदेश दिएको छ। राउतका परिवारले सर्वोच्चमा बन्दी प्रत्यक्षीकरणको रिट दायर गरेकोमा उक्त रिटमाथि सुनुवाइ गर्दै न्यायाधीश प्रकाशकुमार ढुंगाना र नहकुल सुवेदीको संयुक्त इजलासले राउतलाई थुनामै राखेर अनुसन्धान गर्नुपर्ने आधार, कारण र औचित्य नदेखिएको फैसला गरेको छ।

उनलाई अनुसन्धान सम्पन्न नभएसमम नेपाल बाहिर जान नपाउने गरी मुलुकी फौजदारी कार्यविधि संहिताको दफा १५ बमोजिम तारेखमा राखेर मुद्दाको अनुसन्धान गर्न सर्वोच्चले परमादेश दिएको हो।

ललितानिवास जग्गा प्रकरणमा छानबिनका लागि भन्दै सञ्चार तथा सूचनाप्रविधि मन्त्रालयका सचिव कृष्णबहादुर राउतलाई असार २४ मा नेपाल प्रहरीको केन्द्रीय अनुसन्धान ब्‍यूरो (सीआईबी) ले पक्राउ गरेको थियो। भाटभटेनीका सञ्चालक गुरुङलाई असार १२ गते पक्राउ परेका थिए।