![post-slider](/assets/imgs/ads/1140x100 (2).png)
![post-slider](/assets/imgs/ads/NariBachat900x100.gif)
मेसीको काखमा बच्चा यमलको भाइरल तस्बिर कसरी खिचिएको थियो?
![Image](/thumbnails/664d54eb-49d6-4aec-90c5-45234d1d0439_newskarkahna-news726430..jpg)
काठमाडौं- लियोनेल मेसी र फुटबल जगतका नयाँ स्टार लामिन यमलको पुरानो तस्बिरको सामाजिक सञ्जालमा निकै चर्चा भइरहेको छ।
सन् २००७ मा अर्जेन्टिनाका युवा स्टार फुटबलर लियोनल मेसी बार्सिलोना क्लबको क्याम्प नोउको ड्रेसिङ रुममा एउटा च्यारिटी क्यालेन्डर फोटोसुटका लागि एक बच्चासँग पोज दिएका थिए।
त्यतिबेला मेसी २० वर्षका थिए। त्यो समय मेसी 'अल टाइमको महान' खेलाडी बन्ने बाटोको सुरुवाती चरणमा थिए।
तर, सायद त्यतिबेला फोटोग्राफरलाई मेसीको काखमा रहेको बच्चाले पनि एक दिन फुटबलको दुनियाँमा ख्याति कमाउनेछ भन्ने कल्पना थिएन।
उक्त तस्बिरमा मेसीले स्पेनिस खेलाडी लामिन यामललाई काखमा राखेको देखिन्छ। आज करिब १६ वर्षपछि युरो च्याम्पियनसिपबाट यमल विश्व फुटबल जगतमा नयाँ सुपर स्टारको रुपमा उदाएका छन्। उनको उत्कृष्ट प्रदर्शनका कारण स्पेन युरोकपको फाइनलमा पुगेको छ।
१६ वर्ष ३६२ दिनको उमेरमा यमल युरो कपको इतिहासमा सबैभन्दा कान्छो गोलकर्ता बनेका छन्। यमलका बुवाले मेसी र यमलको यो तस्बिर इन्स्टाग्राममा सेयर गरेका छन्। उनले लेखेका छन्, 'दुई महान् व्यक्तिको सुरुवात।'
यी फोटोहरू एसोसिएटेड प्रेसका लागि स्वतन्त्र फोटोग्राफरको रूपमा काम गर्ने जोन मोनफोर्टले खिचेका हुन्।
बालबालिकाका लागि काम गर्ने राष्ट्रसंघीय संस्था युनिसेफले स्पेनको मातारो सहरमा च्यारिटी लटरी आयोजना गरेको बेला यो फोटोसुट गरिएको उनले बताए। यमलको परिवार यहाँ बस्थे।
मोनफोर्टले भनेका छन्, 'यमलको परिवार क्याम्प नोउमा आयोजित च्यारिटी लटरीमा भाग लिइरहेको थियो जहाँ मैले मेसीसँग यमलको यो फोटो खिचेको थिएँ।
फोटोग्राफर मोनफोर्टले यो असाइनमेन्ट सजिलो नभएको बताउँछन् किनभने मेसी लजालु व्यक्ति हुन्।
‘उनी लकर कोठाबाट बाहिर निस्कँदै थिए र संयोगवश अर्को लकर कोठामा पसे जहाँ प्लास्टिकको टब पानीले भरिएको थियो। त्यसमा एक बच्चा थियो। मेसीलाई बच्चालाई कसरी समात्ने भन्ने पनि थाहा थिएन,' उनले भनेका छन्।
यस अवसरका केही तस्विरहरू छन् जसमा मेसीसँगै यमलकी आमा पनि देखिएका छन्। मेसीजस्तै, यमलले पनि बार्सिलोना क्लबबाट फुटबल खेले, जहाँ उनी क्लबको सबैभन्दा कान्छो गोलकर्ता बने। उनी स्पेनिस लिगमा गोल गर्ने सबैभन्दा कान्छो खेलाडी पनि बनेका छन्।
मोनफोर्टले भने, ‘गत हप्ता तस्बिर भाइरल हुन थालेपछि मात्र उनले बच्चा यमल भएको थाहा पाएँ। यस्तो सनसनी सृजना गरेको कुरासँग जोडिन पाउनु निकै रोमाञ्चक छ। साँच्चै भन्नुपर्दा यो एकदमै सुखद अनुभूति हो।'